Жүктіліктің 3-аптасы
Эмбрионның дамуы
Жүктіліктің үшінші акушерлік аптасы жаңа ағзаның дамуының ең басы болып саналады. Жетілген аналық жасуша құрсақ қуысына түседі де, жиырылып, оны жатырға жылжытатын жатыр түтігімен қозғалады. Жолдың соңында ол аталық ұрықпен кездеседі.
Бір шәует жіберу кезінде әйелдің ағзасына миллиондаған аталық ұрық түседі, бірақ солардың біреуі ғана аналық жасушаның қабықшасынан өтіп, онымен қосылады. Еркек пен әйел жасушаларының ядросы хромосоманың жартылай жинағынан тұрады, олар қосылып, хромосомалардың толық жинағы (олар 46 болуы тиіс) бар ұрықты (зиготаны) түзейді.
Зигота өмірінің алғашқы тәулігі өте белсенді өтеді. Ол ұдайы бөлінеді, бірақ ұрықтың өзі өлшемі бойынша ұлғаймайды. Үш тәулік өткен соң ұрықтанған аналық жасуша көптеген бірдей жасушалардан тұрады да, сырт көзге жидекке ұқсайды. Осы кезеңде жатыр қуысына түседі де, дамуын әлі де бірнеше күн жалғастырады. Үшінші аптаның соңында ғана аналық жасуша жатырдың шырышты қабығына бекітіледі.
Жарылған фолликул (соның ішінен аналық жасуша шықты) сары дененің қалыптасуына негіз болады. Оның негізіне кейін прогестерон түзетін лютеин жасушалары кіреді. Бұл процесс әрбір етеккір циклі кезінде болатынын атап өткен жөн, егер жүктілік басталмаса, бір-екі аптадан соң сары дене өмір сүруін тоқтатады.
Егер ұрықталу жүзеге асқан болса, сары дене белсенді дамып, дамудың жаңа кезеңіне өтеді. Енді оны жүктіліктің сары денесі деп атайды, ал ол шамамен бірінші триместрдің соңына дейін (12 апта) өмір сүретін болады. Оның негізгі міндеті – прогестерон шығарып, қорғаныш плацентаның аяғына дейін түзілмейінше, жүктілікті сақтап тұру.
Ұрықталғаннан кейін жатырдың шырышты қабығының құрылымында бірқатар өзгерістер болады. Ол қалыңдап, бекітілген ұрықты жақсы ұстап, қоректендіру үшін қанмен қанығады.
Үшінші аптаның соңында өсіп қалған аналық жасуша жатыр қабырғасына беку процесін бастайды. Ол оған шырышты қабыққа терең енуге көмектесетін айрықша заттар шығарады. Ену орны аздаған уақыт ішінде эпителиймен жабылып, аналық жасуша жатыр қабырғасының ішіне орналасатын болады. Осы кезеңде эмбрион шырышты қабықтың бұзылған қабаттарынан қорек алып, ұдайы өседі де, имплантациялану соңында диаметрі 0,35 сантиметрге дейін жете алады. Бұл кезең шамамен төрт тәулікке созылады, ал оның аяқталуы жүктіліктің төртінші аптасының басталуын білдіреді.
Болашақ ананың жағдайы
Әйел денесінің ішінде болып жатқан белсенді процестер жайында мүлдем бейхабар. Дегенмен, кейбіреулер өздерінің қызықты жағдайы туралы білулері мүмкін.
Үшінші апта – жүктіліктің ең жауапты сәттерінің бірі ғана емес, сонымен қатар ең қауіптілерінің бірі. Ұрықтың өлу қаупі төмендейді, бірақ оның орнына құрсақтағы баланың қалыптасуында түрлі патологиялар мен ауытқулар туындау ықтималдылығы арта түседі. Қауіп-қатер шамамен 7 аптаға дейін сақталатын болады.
Үшінші аптадан бастап құрсақтағы баланың барлық мүшелері мен жүйелерінің қалыптасуы басталады. Мысалы, жүйке және жүрек-қан тамырлар жүйесі, тыныс алу мүшелері және асқорыту жолы түзіледі, аяқ-қолы мен бет әлпетінің нышандары қалыптасады.
Бұл кезеңде әйел өзінің тамақтануына және эмоционалды жағдайына ерекше назар аударуы тиіс. Егер жүктілік жоспарлы болса, бұны жасау әлдеқайда оңай. Олай болмаған жағдайда, болашақ анаға өмір сүру салтын қайта қарастыру үшін жүктіліктің алғашқы белгілерінің пайда болуын күтуге тура келеді.
Алғашқы белгілер
Көптеген әйелдер бұл мерзімде жүктіліктің бастапқы белгілерін жақындап қалған етеккірдің белгілері деп түсінеді. Бұл сезімдер негізді болып саналады, өйткені ағза шынымен кезекті етеккір цикліне дайындалады.
Жалған сезімдерге берілмеу үшін ұрықтанғаннан кейін пайда болатын жаңа белгілерге көңіл аудару қажет. Олар сүт бездерінің ауырсынуын, негіздік температураның көтерілуін және дәм талғамының ауысуын қамтиды. Көптеген әйелдердің тәбеті қатты өзгереді, бұған қоса тамақ ішуді күрт көбейту, не толық одан бас тарту байқалады.
Иістерге аса қатты сезімталдық бөлек санатты құрайды. Сүйікті хош иістер жүктілік кезінде тек күшейе түсетін жағымсыз сезімдерді тудыруы мүмкін.
Жүктіліктің басталғанының қосымша белгілеріне іштің төменгі жағының тартып ауыруы, ішек қызметінің бұзылуы және жиі кіші дәретке бару жатады. Осының бәрі ұдайы шаршағандық пен ұйқышылдық сезімімен қатар өтеді.
Болашақ баланың сыртқы келбеті
Осындай ерте мерзімде ол тек жасуша болып табылады. Бірақ оның ішінде бүкіл генетикалық ақпарат бар, ол жынысының, көзі мен шашының түсінің қалыптасуына әсер ететін болады. Ал әзірге құрсақтағы баланың сырт пішіні көптеген жасушалар көлемінен тұратын үлкен қуыс шарға ұқсайды.
Балаңыздың дүниеге келуіне дейінгі 40 апта сізді таң қалдыратын барлық қызықты, физикалық өзгерістерге және үлкен күн жақындаған сайын өсетін күту сезіміне толы.
-
-
-
0+ мөлшері (2 - 4кг)
Көбірек білу
